جدائی کی پہلی رات

جدائی کی پہلی رات

آنکھ بوجھل ہے

مگر نیند نہیں آتی 

میری گردن میں حمائل تری بانہیں جونہیں

کسی کروٹ بھی مجھے چین نہیں پڑتا ہے

سرد پڑتی ہوئی رات

مانگنے آئی ہے پھر مجھ سے 

ترے نرم بدن کی گرمی

اور دریچوں سے جھجھکتی ہوئی آہستہ ہوا

کھوجتی ہے مرے غم خانے میں

تیری سانسوں کی گلابی خوشبو

میرا بستر ہی نہیں

دل بھی بہت خالی  ہے

اک خلا ہے کہ مری روح میں دہشت کی طرح اترا ہے

تیرا ننھا سا وجود

کیسے اس نے مجھے بھر رکھا تھا

ترے ہوتے ہوئے دنیا سے تعلق کی ضرورت ہی نہ تھی

ساری وابستگیاں تجھ سے تھیں

تو مری سوچ بھی ، تصویر بھی اور بولی بھی

تیرے جانے پہ کھلا

لفظ ہی کوئی مجھے یاد نہیں

بات کرنا ہی مجھے بھول گیا

تو مری روح کا حصہ تھا

مرے چاروں طرف

چاند کی طرح سے رقصاں تھا مگر

کس قدر جلد تری ہستی نے

مرے اطراف میں سورج کی جگہ لے لی ہے

اب ترے گرد میں رقصندہ ہوں

وقت کا فیصلہ تھا

ترے فردا کی رفاقت کیلئے

میرا امروز اکیلا رہ جائے

مرے بچے مرے لال

فرض تو مجھ کو بنھانا ہے مگر

دیکھ کتنی اکیلی ہوں

پروین شاکّر