Hot Line

اس کو مجھ سے کتنا گلہ تھا

میرے اور تمہارے بیچ

اتنے لوگ آجاتے ہیں

بات نہیں ہو سکتی ہے 

موسم کی پہلی بارش میں 

رت کی پہلی برفوں میں

پورے چاند کی راتوں میں

شام کی مدھم خوشبو میں

صبح کی نیلی ٹھنڈک میں

کتنا بے بس ہوتا ہوں

دل کتنا دکھ جاتا ہے

آج مرے اور اس کے بیچ

کوئی تیسرا فرد نہيں ہے 

ہاتھ کی اک ہلکی جنبش سے

مجھ سے رابطہ ہوسکتا ہے 

لیکن وہ آواز سنے

کتنے موسم بیت گئے 

میرے لئے بھی اس کو بلانا 

اتنا مشکل نہيں رہا 

لیکن سچی بات یہ ہے کہ 

لہجوں اور آوازوں کے 

ویسے رنگ نہيں ہيں اب 

دھن تو وہی ہے لیکن دل 

ہم آہنگ نہیں ہیں اب 

الگ ہیں خواب اس کے 

زندگی میں اس کی ترجیحات ہی کچھ اور لگتی ہیں

بہت کم بولتا ہے 

مجھے اس نے لکھا ہے 

صبح

میں نے لان میں کچھ خوبصورت پھول دیکھے 

مجھے بے ساختہ یاد آگئیں تم

مجھے معلوم ہے 

میں عمر کے اس ملگجے حصے میں ہوں

جب میرا چہرہ 

کسی بھی پھول سے قربت نہیں رکھتا

مگر جی چاہتا ہے 

اس کی باتوں پر

ذرا سی دیر کو ایمان لے آؤ۔ 

پروین شاکّر