Urdu Poetry - Ghazal

راہ دشوار کی جو دھول نہیں ہو سکتے

ان کے ہاتھوں میں کبھی پھول نہیں ہو سکتے

تیرے معیار پہ پورے نہ اترنے والے

معصب عشق سے معزول نہیں ہو سکتے

اتنا خوں ہے مرا گلشن میں کہ اب میرے خلاف 

پیڑ ہو جائیں مگر پھول نہیں ہو سکتے

حاکم شہر کے اطراف وہ پہرہ ہے کہ اب

شہر کے دکھ اسے موصول نہیں ہو سکتے

فیصلے جن سے ہو وابستہ وطن کی قسمت

صرف اندازوں پہ محمول نہیں ہو سکتے

خون پینے کو یہاں کوئی بلا آتی ہے 

قتل تو روز کا معمول نہیں ہوسکتے

جنبش ابروئے شاہاں نہ سمجھنے والے

کسی دربار میں مقبول نہیں ہو سکتے

پروین شاکر